تقريبا مابين الساعة الرابعة والنصف والخامسة من يوم 17 اغسطس الذي وافق الجمعة … كانت ولادتي … تحديدا فجر الجمعة وحسب ماترويه والدتي … كانت تشريفتي مع اذان صلاة فجر يوم الجمعة … يعني مع فجر الجمعة يصبح عمري 23 سنة

في كل سنة … قبل السنة هذه … كنت اعيش بنوع من الكابة … وخاصة اني كنت اطالع خلفي واشوف اش حققت والاقي انه مافي شي يذكر … البتة … او مافي حاجة تخليني من الناس الي تتخلد اسمائهم …

السنة هذه … في بصيص امل وهذا الشي الي خلاني ابتعد نوعا ما عن الكابة … السنة هذه بنظر خلفي احصل كتاب ممكن افتخر بيه في يوم من الايام … لكن في نفس الوقت اعيش في حذر شديد جدا … كيف حيكون وضع الكتاب ! هل حجي السنة الجية زي دي الايام واقول يا سلام ولا حجي السنة الجية زي دي الايام واقول نفس الحالة لا جديد !

الشي الثاني الي افكر فيه واش يعني كتاب ! ماكل الناس بتعمل كتب مش كتاب واحد وابدا كتاب مو الشي الي راح يكون داك الشي الكبير … يمكن كتاب كتابين ثلاثة … تخلي الواحد ها يحس انه انجز … وبعدين ارجع افكر هل كده كفاية !

ما علينا … لا اطول عليكم …

الشي الي مخليني فرحان اني انجزت عمل … قبل ما اكمل 23 سنة على الارض والي مخليني افرح اكثر اني صاحب اول كتاب عربي لتعليم الـiPod & iTunes …
لكن السؤال هل يكون افضل كتاب كمان !

يلا عشان لا ادخلكم في متاهتي … السنة الجاية زي هذا اليوم يعني 16 اغسطس راح اكتب موضوع … ونشوف كيف راح يكون …

على فكرة وانا اكتب الموضوع اتذكرت كلام صديق ليا !
بعد ماعملت اختبار على الانترنت كان اختيارات لوصف الشخصية
كان مكتوب … في النتيجة او من ضمن النتائيج انت كل ماتصل لحاجة معينة … تطالع وراك وتحتقرها وتقول هيا ولا شي وانا لسه ماوصلت … ابغى زيادة